२०७७ असोज ०८ गते बिहिबार | 24 September, 2020

नेकपा स्थायी कमिटी बैठक सकियो

पुनर्वास खबर शुक्रबार २६, भदौ २०७७ ०४:२२

नेकपा स्थायी कमिटी बैठक सकियो

काठमाडौँ । नेपाल कम्युनिष्ट पार्टी (नेकपा) को स्थायी कमिटी बैठक सकिएको छ । शुक्रबार बिहान ११ बजेबाट सुरु भएको बैठक सम्पन्न भएको हो ।

नेकपाको स्थायी कमिटी बैठक असार १८ गतेबाट स्थगित हुँदै आएको थियो ।प्रवक्ता नारायणकाजी श्रेष्ठले दुवै अध्यक्षले तयार पारेको प्रस्तावमा १३ जना स्थायी कमिटी सदस्यले आफ्नो धारणा राखेको जानकारी दिए । आजको बैठकमा वरिष्ठ नेता माधव कुमार नेपाल, झलनाथ खनाल, भीम रावल, रघुजी पन्त, नारायणकाजी श्रेष्ठ लगायताका नेताहरुले बोलेका थिए ।

बैठकमा अध्यक्ष एवं प्रधानमन्त्री केपी शर्मा ओली र अध्यक्ष पुष्पकमल दाहाल ‘प्रचण्ड’ बीचको सहमतिका आधारमा गठित महासचिव विष्णुप्रसाद पौडेल नेतृत्वको समस्या समाधान कार्यदलको सुझावलाई थप गृहकार्य गरी ठोस कार्ययोजनाका रुपमा प्रस्ताव प्रस्तुत गरिएको थियो ।

पार्टीको आन्तरिक विवाद मिलाउन अध्यक्षद्वयले गठन गरेको कार्यदलले दिएको प्रतिवेदनबारे यही भदौ १८ गतेको सचिवालय बैठकमा छलफल भएको थियो । गत साउन ३० मा भएको छलफलबाट महासचिव पौडेलको संयोजकत्वमा गठित छ सदस्यीय कार्यदलले यही भदौ ६ गते अध्यक्षद्वयलाई प्रतिवेदन बुझाएको थियो ।

प्रतिवेदनमा प्रधानमन्त्री ओलीले सरकारको काममा केन्द्रित भई बाँकी कार्यकाल पूरा गर्ने र अध्यक्ष दाहालले पार्टीको कार्यकारी अध्यक्षमा आफूलाई केन्द्रित गर्ने, मन्त्रिपरिषद्मा आवश्यकतानुसार हेरफेर गर्ने, तोकिएको समयमा महाधिवेशन गर्ने, एकताका बाँकी काम शीघ्र पूरा गर्नेलगायत सुझाव छन् ।

नेकपामा गत असार १० गते शुरु भएको स्थायी कमिटी बैठकमा नियमित कार्यसूचीका अतिरिक्त शक्ति बाँडफाँट र सरकार–पार्टीबीचको समन्वयबारे विवाद उत्पन्न भएपछि कार्यदल गठन गरिएको थियो ।


प्रतिकृया दिनुहोस